Dane Paulus Malayar ka Kota Roma
27
Sasampune kenten,
dane Paulus lan para bogolane sane lianan katetepang mangda malayar ka Italia.
Irika raris ipun sami kaserahang ring prawira pasukan kaisar Romane sane mapesengan Yulius.
Tiang Lukas taler nyarengin dane Paulus.
2 Tiang sami munggah ka kapale sane rauh saking Kota Adramitium.
Kapale punika jagi malayar ka pelabuhan-pelabuhan ring Propinsi Asia Alit.
Duk punika,
wenten anak sane mapesengan Aristarkus saking Kota Tesalonika,
Propinsi Makedonia.
Ipun pada malayar sareng-sareng tiang sami.
3 Benjangane tiang sami rauh ring Kota Sidon.
Dane Yulius malaksana becik kapining dane Paulus.
Dane Paulus kicen galah nelokin para sawitran danene mangda ipun sami ngicen sekancan kaperluan danene.
4 Sasampune kenten,
tiang sareng sami nglanturang malayar.
Nanging krana kapale mapas angin,
tiang sami raris malayar ngentasin pasisir Pulo Sipruse mangda mresidayang ngelidin angine punika.
5 Wusan punika,
tiang sami malayar nyebrang segara linggah sane wenten ring arepan Propinsi Kilikia miwah Wawidangan Pampilia.
Raris tiang sami rauh ring Kota Mira ring Wawidangan Likia.
6 Irika raris prawirane polih kapal saking Kota Aleksandria sane jagi malayar ka Italia.
Raris prawirane punika ngajak tiang sami makisid ka kapale punika.
7 Makudang dina suene kapale alon-alon pisan malayar tur antuk pakeweh sane ageng;
pamuputne tiang sami sida rauh nampek Kota Knidus.
Krana mapas angin,
tiang sami malayar ngentasin pasisir Pulo Kreta ngliwatin Tanjung Salmone.
8 Tiang sami malayar ring pasisir pulone punika antuk pakeweh sane ageng kantos rauh ring Pelabuhan Luih nampek Kota Lasea.
9 Tatkala punika sampun akeh telas galahe ring pamargin tiange sami.
Samaliha baya pisan yening tiang sami nglanturang malayar sasampune liwat rahina ageng mapuasa anak Yahudine,
krana galahe punika biasane wenten angin nglinus lan ombak ageng.
Punika mawinan dane Paulus ngicen piteket kapining ipun sami saha mabaos sapuniki,
10 “Semeton sareng sami,
manut papineh tiange baya pisan yening iraga nglanturang malayar.
Iraga jagi keni sengkala lan pocol,
boya ja krana kelangan barang-barange lan kapale kamanten,
nanging krana iraga taler ngetohin urip.”
11 Nanging prawirane punika lebih pracaya kapining juru mudine lan sane nuenang kapale bandingang kapining baos dane Pauluse.
12 Pelabuhane irika nenten becik dados genah kapal-kapale mareren tatkala masan dingin.
Punika mawinan akeh anake sane ring kapale pada setuju mangda nglanturang malayar.
Ipun sami meled mangda mresidayang rauh ring Kota Peniks,
tur meneng irika tatkala masan dingin.
Peniks punika pelabuhan sane wenten ring Pulo Kreta sane marep kaja kauh lan kelod kauh.
13 Ritatkala angine saking kelod ngasirsir alus,
para pegawe kapale ngaden sampun dados nglanturang malayar saking pelabuhan Luih.
Raris ipun ngancit jangkar kapale tur malayar ngentasin sisin pasih Pulo Kretane.
Angin Linus sane Ageng
14 Nanging nenten sue sasampune paindikane punika,
wenten angin linus rauh saking pulone punika.
Angine punika kasambat angin kaja kangin.
15 Tur kapale kaampehang angin linuse punika kantos nenten mresidayang mapas angine.
Punika mawinan tiang sami nyerah tur manggiang kapale kaampehang angin.
16 Raris tiang sami anyud ngliwat pasisir pulo alit,
inggih punika Pulo Kauda.
Punika mawinan tiang sami polih mengkeb akidik saking angine.
Antuk pakeweh sane ageng,
pamuputne tiang sami mresidayang nguasain sekoci sane mategul ring dorin kapale.
17 Sasampune sekocine punika kaunggahang ka kapale,
raris pegawe kapale negul tur ngilit kapale punika nganggen tali mangda kapale nenten benyah uyak ombak.
Krana segarane ring Sirtis daken,
para pegawe kapale jejeh yening kapale kampih ring biase.
Punika mawinan ipun sami nedunang layar kapale lan manggiang kapale anyud nuutin angine.
18 Krana angin linuse nenten wus-wusan makuus,
punika mawinan benjangane anake sami pada ngawitin ngentungang barang-barang muatan kapale ka segarane.
19 Benjangane malih para pegawe kapale ngentungang ka segarane prabot-prabotan kapale sane nenten utama nganggen tangannyane praragan.
20 Makudang dina suene tiang sami nenten nyingakin matan ai lan bintang.
Turmaning angin linuse nenten wus-wusan makuus.
Pamuputne tiang sami nyerah krana mapineh nenten jagi slamet.
21 Duk punika,
makudang dina suene anake irika nenten ngajeng.
Raris dane Paulus ngadeg ring tengah-tengah ipune sami tur mabaos sapuniki,
“Duh para semeton sami!
Yening semeton ninutin piteket tiange mangda nenten malayar saking Pulo Kreta,
pastika iraga nenten nandang pakeweh tur pocol sekadi mangkin.
22 Nanging sane mangkin,
tiang nuturin semeton buat ngukuhang manah semetone.
Krana nenten wenten saking semeton sane jagi padem,
nanging wantah kapale kamanten sane jagi ical.
23 Krana dibi sanja,
wenten malekat sane kautus sid tiange olih Sang Hyang Pengardi sane sembah tiang lan sane nuenang dewek tiange.
Malekate punika ngadeg ring samping tiange
24 tur mabaos sapuniki,
‘Duh Paulus,
eda ja jejeh!
Krana ragane bakal tangkil sid kaisar Romane.
Malantaran welas asih Sang Hyang Pengardi tekening ragane,
makejang anake ane bareng-bareng malayar ajak ragane bakal slamet.’
25 Punika mawinan,
kukuhang ja manah para semetone!
Krana tiang pracaya,
napi sane sabdayang Sang Hyang Pengardi pastika jagi mamargi.
26 Nanging iraga jagi kampih ring salah tunggal pulo.”
27 Ngantos wengine sane kaping pat belas,
kapale kari anyud kaampehang angin ring segara Adria.
Sawetara ring tengah lemenge,
para pegawe kapale ngrasayang kapale nampek ka pasisir.
28 Punika mawinan,
ipun sami ngukur dalem segarane nganggen batu sane kategul aji tali.
Sekadi punika ipun sami uning dalemne irika sawetara petang dasa (40) meter.
Sasampune nglanturang malayar malih akidik,
raris ipun sami malih ngukur dalem segarane tur dapetanga dalemne telung dasa (30) meter.
29 Krana jejeh yening kapale jagi kampih ring batu kaange,
raris ipun sami nedunang papat jangkar saking ungkur kapale tur nunas dumogi gelis semeng.
30 Para pegawe kapale mapineh jagi malaibang raga.
Irika ipun nedunang sekocine mapi-mapi nedunang jangkar saking arep kapale.
31 Nanging dane Paulus mabaos kapining prawira lan para tentarane sapuniki,
“Yening para pegawe kapale puniki nenten meneng ring kapale,
semeton sami nenten ja jagi slamet.”
32 Punika mawinan para tentarane ngetep talin sekocine punika,
tur sekocine raris anyud.
33 Ritatkala galang kangin,
dane Paulus raris ngajakin anake sami mangda ngajeng.
Dane mabaos sapuniki,
“Sampun pat belas dina suene semeton sami nyantosang lan marasa jejeh,
samaliha nenten ngajeng napi-napi.
34 Punika mawinan,
tiang nunas ngajeng ja dumun mangdane semeton kuat malih.
Semeton sinamian jagi slamet tur nenten kenapi-napi.”
35 Sasampune mabaos sekadi punika,
dane Paulus ngambil roti saha ngaturang suksma kapining Sang Hyang Pengardi ring arepan anake sami.
Irika raris dane ngompes-ngompes tur ngedum-edumang rotine punika raris dane ngajeng.
36 Lan manah ipune sami dados saat raris ipun ngajeng.
37 Tiang sami ring kapale sareng satak pitung dasa enem (276) diri.
38 Sasampune ipun sami pada wareg ngajeng,
ipun ngentungang muatan gandume ka segarane mangda kapale ngancan ingan.
Kapale Kelem
39 Ritatkala sampun galang,
para pegawe kapale nyingakin teluk sane pasisine asah,
nanging ipun nenten uning pulo napike sujatine punika.
Yening mresidayang,
ipun sami mapineh jagi ngampihang kapale irika.
40 Raris talin jangkare kagetep mangda kelem ring segarane.
Salanturnyane ipun sami ngelus tali-tali penegul kemudi kapale.
Tur ipun ngeberang layar kapale sane ring arep mangda kapale kaampehang angin nuju ka pasisir pasihe.
41 Nanging kapale punika nomplok dasar biase;
arep kapale nganceng kantos nenten mresidayang makrisikan.
Tur ungkur kapale benyah katomplok ombak sane kalintang keras.
42 Para tentarane punika madue manah jagi ngamademang para bogolane krana ipun jejeh yening bogolane punika jagi nglangi ka sisi raris malaibang raga.
43 Nanging prawirane punika nambakin para tentarane krana prawirane meled nylametang dane Paulus.
Prawirane mrentahang anake sane mresidayang nglangi mangda macebur tur nglangi ka pasisir.
44 Salanturnyane anake sane lianan nugtug nglangi nganggen papan wiadin kepeh-kepehan kapale.
Sekadi punika tiang sami slamet kantos ka pasisir.